بـعـد الـزعــل لـحــظـة رضــاك

ياحي جيت ازعلك لحظه واراضيك
الله يابعد الزعل لحظة رضاك

اشعلك واطفي واهج(ن)يشتعل فيك
اطفي الزعل بك واشعل الشوق جوّاك

واذا انتثر دمع العتب فوق خديك
وانساب لين يحل ضيف(ن)على شفاك

والأبتسامه خالطت دمع عينيك
ياكن دمع العين جاك ايـ (ترجّاك)

غالي منك وقّف على غالي(ن)فيك
وصار العطاء مدري منك او هو اعطاك

وفي صمت كفك عانقت كف غاليك
وكن الخلايا تعتذر من خلاياك

الملمك واجمع شتاتك واخليك
تنسى الخطاء منّي وانا انسى خطاياك

قرب وانا اقرب تحتويني وانا احويك
لين انت تسكني وانا اسكن ثناياك

يمناي من تحتك والأخرى تغطيك
وانا بعد تحت ايمنك فوق يسراك


في همس تحكي لي وفي همس احاكيك
تسأل واجاوب وأسألك واتحراك

وتقول انا مبكي منك لكن ابكيك
اخاف من صدّك وهجرك وفرقاك

واقول لك معقوله اقفي واخليك
وانساك لاواللي من الطين سوّاك

تشهق وتضحك لي وتقرب وانا اجيك
حتى ضلوعي تلتحم مع حناياك

ومابين يدّيني وانا بين اياديك
نرقى سوى نعبر مدارات وافلاك

ونرحل بحاضرنا لماضي لياليك
ونبقى معـاً ماغير انا بس وايّاك


وتقول لي ياحي ازعل وابرضيك
الله يابعد الزعل لحظة رضاك


لــلــــــشــــاعـــــر / بــــدر الشــــمـــــــري



------------------------